نموذج امتحان مهم جدا لو عاوز تنجح

بمناسبة موسم الانتحانات

نقدم لكم نموذج انتحان

اللغة اللى كانت عربية

اكتب ما لايقل عن 650 سطر فى أحد الموضوعات التالية
لم يجد الطفل غير الشارع ملجأ نظرا لحالة البلد الهباب..فاتجه إلى السرقة والقتل والحشيش.. حتى نال جزاءه وقبض عليه متلبسا بباكتة بانجو.. اكتب قصته مع تسليم الحِرز للباشا مراقب اللجنة
او
شهدت بلدنا الحبيبة نهضة فى مجال التشييد والبناء وخصوصا بعد وصول سعر الحديد إلى 7000 جنيه للطن.. اكتب ما يمليه عليك ضميرك على أن يبدأ موضوعك بعبارة أنا باشتغل فى حديد عز
او
بعد انتشار ظاهرة أكل لحم الكلاب والحمير..من وجهة نظرك تكلم عن هذه الظاهرة ومن المتسبب فيها بدون غلط..الورق متراقب
ــــــــــــــــــــــــــــــــــــــــــــــــــ ـــــــ
السؤال الثانى: القصة
من قصة " وعهد الله ما انت داخل الانتخابات" .. اقرأ القطعة وأجب عن الآتى
ثم أتى إليه وضربه بالجزمة وقال: انت عايز تترشح فى الانتخابات يامعفن؟؟ دانت عايز معجزة..مش كفاية بتاكلوا لحمة ومستورين.. عايزين إيه تانى؟

ما هى اللحمة؟ أو على الأقل حدد أقرب معنى خيالى لها
مرادف معجزة فى اللغة ( تغيير وزارى – زيادة المرتبات – رغيف العيش) اختر يا قليل البخت
لماذ ضربه الرجل بالجزمة وليس بالعصى مثلا؟؟اختر من الاتى
(أهو كسل .. لسة هيرفع العصاية؟ /

/ عشان العصاية قلة قيمة برضه واحنا فى عصر الديمقراطية /

/ عشان العصاية مع واحد تانى)

حلل بمزيد من التفصيل جملة ضربه بالجزمة ومدى توافقها مع جملة مصر بتتقدم بينا
ــــــــــــــــــــــــــــــــــــــــــــــــــ ــــــــــ
السؤال الثالث القراءة
من موضوع ( الزعيم..و الفنان.. والقدوة) اقرأ القطعة وأجب
وقد نفى الزعيم عادل إمام الإشاعات التى أكدت أنه مرشح لوزارة الثقافة.. وأكد أنه فنان فقط وليس سياسيا الخبر حقيقى كما أنه يرحب بالتوريث ومقتنع بكل سياسات الحكومة

دخل كاتب هذه السطور مسرحية بودى جارد للزعيم رغم قرفه منه أساسا.. فى رأيك ما السبب فى دخوله؟
(أكيد معزوم – طبيعى معزوم – وربنا معزوم..) اختر
على أن تحلف للمراقب بتاع اللجنة
ــــــــــــــــــــــــــــــــــــــــــــــــــ ــــــــــــ
السؤال الرابع النصوص
أجب عن أحد النصين الآتيين
من نص ( ماشربتش من نيلها)..اقرأ ثم أجب
ماشربتش من نيلها.. جربت تغنى لها.. جربت فى عز ماتحزن تمشى ف شوارعها وتشكى لها

بعد رغبة صاحبة النص فى أن تلد ابنتها فى أمريكا لتحصل على الجنسية الأمريكية..اختر..ما المقصود بنيلها فى النص؟
(المسيسبى - الأمازون – يونج يانج ) أختر

هذا النص من نصوص الحزب الوطنى والدليل وجود اسم مهم من قيادات الحزب فى النص.استخرج الاسم..وبوسه ورجَّعُه مكانه

أكمل الأبيات إلى آخر كحكة فى الكليب

قوبل النص بانتقادات بسبب بعده عن الواقع..وضح من النص ما يتفق مع القول المأثور اطبخى ياجارية .. كلف يا سيدى
ــــــــــــــــــــــــــــــــــــــــــــــــــ ـــــــ
من نص (حين ميسرة)..أجب عن الآتى
-اذكر اسم مصيبة واحدة محصلتش فى النص الأسود ده
-وضح عبقرية أحمد بدير الإرهابى فى النص وهو يكتب رسالة على الكمبيوتر باستخدام أزرار الأرقام فقط ومفيش حروف.. ويعطى أمر التنفيذ بزرار قايمة ستارت مش بإنتر.كمبيوتر إرهابى بقى
-سبب وجود الشرطة كل خمس دقائق فى النص
موسم ترقيات عقبال أملتك ولازم شغل – أخو خالد يوسف ظابط ولازم يخدم أخوه – عشان الشرطة بتراقب قسم البوليس اللى جنب أحداث النص اختر
ــــــــــــــــــــــــــــــــــــــــــــــــــ ـــــــــ
السؤال الخامس النحو
أعرب ما تحته خط.. لو مالقيتش القطعة أصلا ..اتصرف
ذهب الرئيس إلى المؤتمر .. ضع الجملة السابقة فى صيغة المثنى.. ماعدا الرئيس طبعا
كان ممدوح إسماعيل قاتلا .. ضع إن مكان كان.. على ألا تنصب ممدوح.. عشان هوه بينصب لوحده
فُرِضت الضرائب علينا ببشاعة ..أعرب الجملة .. وارفع الضرائب أبوس إيدك
ــــــــــــــــــــــــــــــــــــــــــــــ
السؤال السادس الخط
كوز المحبة انخرم..طرطش على كمى..ياحبيبى بطل جفا وارحم عذاب امى
اكتب الجملة السابقة ثلاث مرات بثلاث خطوط.. موبينيل وفودافون واتصالات..كما يمكن التحويل من خط لخط بنفس الرقم.. فقط اتصل بخدمة العملاء

واخيرا
ياترد وتنجح
يا؟؟؟؟؟؟؟؟؟

الامتحان صعب يا أفندم وفوق مستوى الطالب المتوسط...أطالب بتغيير الامتحان أو تغيير الحكومة..اختار الأسهل بالنسبة لك..

التلاميذ الاعزاء
الامتحان من داخل المنهج
و الاستاذ حواس اللى واضع الامتحان
متحول للتحقيق
لأنه جايب أسئلة كل كلكم تعرفوا تحلوها بسهولة و فى وقت قياسى

و انت يا حواس
أبقى قابلنى لو حد اترافع عنك

عارف ليه

/
/
/
/
/
/
/
/
/
/
/
/
/
/
/
/
/
/
فين يا عم اسطوانة صور الفوتو شوب
؟؟؟؟؟؟
شفت بقى

هههههههههههههههههههه

استاذى العزيز عبد الله
شرفتنى بردك
والامتحان سهل بس انت مش مذاكر كويس

ثانيا /علشان خطرك نغير الامتحان والحكومة كمان

اخى العظيم مستر حسام
كرم كبير منك ردك على الموضوع

وان شاء الله احاول اشوف الاسطوانه النهاردة وابعتها لك مع احمد
اصل انا كنت نسيت
وشكرا لك انك فكرتنى

» نموذج للامتحان المثالى فى مصر
» غبى فى امتحان نحو الامية
» امتحان مزهل جدااااااااااااااااااااا
» لغه عربيه أولى ثانوى (نموذج لاختبار اللغة العربية العامة)
» سكران فى امتحان النحو