يا فاشل يا فاشل يافاااااااااااااااااااااااااااااااشل

فاكرين فيلم الباشا تلميذ ...؟!

الفنان حسن حسنى و هو بيصرخ فى وش كريم عبد العزيز و بيقوله يا فاشل يا فاشل . يا فاشل يا فاشل . و كريم عبد العزيز بيقوله كفاية يا افندم سيحتيلى فى المكان ...
اهو احنا النهاردة يا جماعة اتسيحلنا فى المكان...
الاتحاد الدولى يغرم مصر200000 جنيه و نقل 2 مباراة من القاهرة فى اول تصفيات . اما احداث السودان فلم يتم النظر فيها و الله اعلم حينظر فيها و الا لا . طيب اتحادنا الموقر برئاسة الفاشل.. سمير زاهر عمل ايه . و قال ايه بعد شهور الاوهام اللى عشنا فيها و اللى مسئولى اتحادنا الموقر عملوا فيها عناتير ولاد شداديد ( جمع عنترة ابن شداد ) . قال ايه يا اخوانا المسئولين دول قالوا ان العقوبات كانت متوقعة و مخففة و فيها انصاف لمصر
يا لهوى ... امال انتوا كنتم بتعملوا ايه و جبتم حقنا ازاى . كده منصفة يا عم الحاج اما لو ظالمة كانت تبقى ايه .
و يا فاشل يا فاشل . يا فاشل يا فاشل يا فاشل
و لان الشئ بالشئ يذكر فاحنا حملنا لؤاء الفشل فى كل المجالات السنة دى 2010 دخلتها حلوة اوى علينا يا جماعة . يعنى فشلنا فى ادارة ازمة مياه النيل و اربع دول من دول المصب وقعت اتفاقية جديدة لتقسيم المياه . و التلات دول التانيين بيشاوروا عقلهم يوقعوا و الا لا و غالبا حيوقعوا هما كمان هما صغيرين يعنى
احنا بقى بنعمل ايه . عمالين نقول ايه لا خوف على حصة مصر من مياه النيل . حصة مصر تحكمها اتفاقيات دولية موقعة من عهد الاستعمار البريطانى و مش من حق الدول دى تغيرها او ترفضها . و مصر حتحافظ على حقوقها التاريخية فى مياه النيل . و احنا عمالين نتكلم و نتكلم و نكلم نفسنا . و اثيوبيا الشقيقة و خد بالك من شقيقة دى بتبنى اول سد من غير موافقه مصر على النيل الازرق احد روافد النيل بتاعنا . و السد بتمويل ايطالى واخدلى بالك انت . ما هى ايطاليا دى واحدة من دول الاتحاد الاوروبى اللى مسئولينا بيقولوا انهم متفهمين الموقف المصرى . واضح التفهم . على فكرة اثيوبيا بتخطط لبناء 70 سد فى 10 سنين
السيد وزير الرى عندنا قالك ايه بقى قالك لا خوف على حصة مصر من مياه النيل ( برضه ) , و مصر بتتابع اى منشات على منابع النيل بالقمر الصناعى ( يا جامد ) و فى حالة فشل المفاوضات لحل الازمة مصر حتلجأ للتحكيم الدولى . ( هو الوزير مش واخد باله ان المفاوضات فشلت ؟؟ )
اما السيد رئيس الوزراء بتاعنا كرم الله وجهه قالك ايه برضه حقوقنا تاريخية فى مياه النيل و ما فيش حد يقدر يمسها . و احنا بنحاول ندعم التعاون الثنائى بينا و بين دولة اثيوبيا الشقيقة ( كلمة شقيقة دى بتجيبلى حساسية بصراحة . ورا كل مصيبة او اهانة لمصر تلاقى كلمة شقيقة دى قاعدة تحت تشاورلك بايديها )
و يا فاشل يا فاشل , يا فاشل يا فاشل يا فاشل

و استمرارا لمسلسل الفشل المصريين بيتقتلوا فى كل حتة و الا حد دريان بيهم . اللى مات فى لبنان و هو متهم بالقتل . طيب حد عارف التحقيقات هناك وصلت لفين . المهندس المصرى اللى قتل فى نيجيريا و قالوا فى الاول انضرب بالنار و بعدين التقرير الطبى اللى اتبعت مع جثمان الراجل قال سبب الوفاة الضرب على الرأس بالة حادة سببت نزيف فى المخ و كسور فى الجمجمة ادت الى الوفاة . و مصرى كمان وجدوه متقطع فى اليونان . دا غير حوادث كتير و كتير و كتير بتحصل للمصريين فى الغربة و ماحدش دريان بيها . طيب فين السفارات بتاعتنا . فين وزارة الهجرة , فين وزارة الخارجية .
و يا فاشل يا فاشل . يا فاشل يا فاشل يا فاشل

و ادخل بقى على الاضرابات و الاعتصامات . الناس يا ولداه حمضت بالمعنى الحرفى للكلمة قدام مجلس الشعب . و النهاردة ناموا وسط الشارع قدام الباب الرئيسى للمجلس و قطعوا طريق العربيات و الا حياة لمن تنادى و الحكومة سايباهم من باب من حقك يا مواطن تعتصم و تضرب دماغك فى الحيط . و من حقك يا حكومة و الا تعبرى حد . هزلت هيا ولا ايه شوية اعتصامات و اضرابات تهز عرش الحكومة المصون . الحكومة مالهاش دراع يتلوى على رأى كمال الشناوى فى فيلم الارهاب و الكباب
لا حكومتنا بقى ردت على الاعتصامات بزيادة الضرايب على السجاير و الحديد و الاسمنت و كل سنة و انت طيب من بكرة حتلاقى سعر اللبان زاد ما هى اول ما حاجة بتزيد كل حاجة بتزيد وراها الا البنى ادم هو بس اللى بيرخص
و يا فاشل يا فاشل يا فاشل يا فاشل يا فاشل

فشل فى كل مجالات حياتنا . فشل فى كل سلوكياتنا و احوالنا . انهيار تام فى كل شئ . ليه . علشان كل مسئول فاشل مش بيتحاسب . علشان الاهمال و المحسوبية هما الاساس . علشان ما فيش عندنا نظام فى اى شئ . عشان من الاخر غاويين جعجعة و طق حنك على رأى الشوام من غير فعل
اسؤا شعب سكن مصر هما الشعب المصرى الحالى الساكت عن الجهل و الفشل و الاستهبال . و فاضى لماتشات الكورة و اعلانات ميلودى . الشعب اللى ساب كل شئ و تفرغ للتناحر مين مطرب القرن عمرو دياب و الا تامر حسنى . الشعب اللى بيمشى فى مظاهرة و يزعق و يهتف و يروح بالليل يقعد على القهوة يدخن سيجارة الحشيش المعتبرة و يرضى عن نفسه و عن الكون .
و يا فاشل يا فاشل يا فاشل يا فاشل يا فاشل

فى الاخر نداء الى كل مسئول فاشل , و حياة ابوك يا شيخ تمشى . امشى بس . فى اليابان المسئول الفاشل او المهمل بيجيب سيف حلو كده و يدبه فى بطنه عشان مش بيقدر يعيش و هو متحمل خطيئة الفشل و الاهمال . بلاش يا عم تنتحر انت بلاش تموت كافر ( و لو انك برضه حتتشوى فى نار جهنم على اهمالك يعنى ) . بس امشى يا شيخ و حياة ابوك . خربتها و قعدت على تلها سيبها بقى...
يافااااااااااااااااااااااااااااااااااااااااااااااشل

قفص

بقالى كتير جدا لم استمتع بكلامك يا استاذ محمود
والله يا أخى كلمه فاشل دى اقل كلمه تتقال على العصابه دى
دول ولااااااااااااد كلللللللللللللللللللللللللب

المسئولون عندنا أحبوا الفشل لدرجة إنه تحول عندهم لهواية

أبو كريم كتب:: المسئولون عندنا أحبوا الفشل لدرجة إنه تحول عندهم لهواية

ميقدروش يعيشو من غيره

بقه عامل زى الميه والهوا

موضوع جميل

» إنتا فاشل؟