مفيش حد مع الناس فعلا..!!

السلام عليكم ورحمة الله وبركاته

كل عام والجميع بالف خير بمناسبة شهر رمضان الكريم.
اعاده الله علينا وعليكم وعلى الامه الاسلاميه بالخير واليمنى والبركات .
ثم بعد ..
جملة كتبها وحيد حامد و قالها بلسانه عزت العلايلى فى برومو مسلسل الجماعة بس شدتنى قوى ( الحكومات تصنع ألام الناس . و الاخوان و الاحزاب بيتاجروا بالام الناس . لكن ما فيش حد مع الناس )
هذه الجمله للاسف صادقة و حقيقية و جاية فى الصميم... فعلا اطراف لعبة السياسة فى مصر بيلعبوا لصالح اى حد الا الطرف الوحيد اللى هما اصلا موجودين علشانه
حكوماتنا المتعاقبة بتعمل كل ما فى وسعها من اجل ابناء الشعب من اهل الصفوة و المحاسيب و رجال الاعمال و اثرياء الزمن الجديد ... و مقدرات الحكومة و الدولة و البلد كلها موجودة من اجل رجال الاعمال لزيادة ثروتهم و اموالهم ( اللهم لا قر و لا حسد ) اما بقى الصنف التانى من الشعب اللى بيركب الاتوبيس ابو ربع جنيه او التابوت الطائر الملقب خطأ بالميكروباص ... اللى بيقفوا فى طابور المأسوف على شبابه الرغيف ابو شلن او بيستنوا قرار العلاج على نفقة الدولة اللى على ما يطلع يكون المريض و اهله انتقلوا الى الرفيق الاعلى و اتحاسبوا كمان ... الفئة دى من الشعب فى رأى الحكومة فئة مزعجة و مالهاش اى لزمة و قلتها احسن ... و عشان كده الحكومة بتعمل اللى عليها من اجل التخلص من الازعاج ده عن طريق الاكل المسموم و الميه الملوثة و الادوية الفاسدة و اهو كله بثوابه و بيريحونا من الدنيا و بلاويه.
ا
ندخل بقى على الاحزاب ..
احزابنا الله يعزها نمور من ورق ... جرايد و طالع ليها احزاب وليس العكس ... ما فيش عندهم غير الكلام و الصريخ و الطنطنة عن الحكومة و بلاويها ... طيب يا سيادة الحزب المعارض انت عملت ايه للناس ... يقولك و انا اعمل ايه انا مش حكومة الحكومة هى اللى تعمل ... لما ابقى حكومة حاعمل و طبعا لو بقى حكومة مش حيعمل غير لكرشه و كرش نوابه و سلملى بقى على الناس...!!
مصر فيها حوالى 20 حزب تقريبا ان لم تخنى الذاكرة اكثرهم تأثيرا حزب الاهلى و الزمالك و تامر حسنى و عمرو دياب .. و لا عزاء للاحزاب..!

الاخوه الاخوان بقى اذكى العناصر دى ... عرفوا الناس بتحب تسمع ايه و ركزوا على كده .. احنا نحب اللى يواسينا و يطبطب علينا و نموت فى اللى يقولنا قال الله و قال الرسول عليه الصلاة و السلام حتى لو مش مؤهل و اشتغلوا على كده ... و الصراحة انهم عملوا حاجات للناس البسيطة ... بس كلامهم عن الديمقراطية و الحرية و الكلام الحنجورى المنجورى ده هدفه الاسمى فى النهاية مش مصلحة الناس ... هدفه الاسمى الكرسى و السلطة و الحكم حتى لو باستخدام الدين كوسيلة مع شعب متدين بطبعه رغم المظاهر الاوربية اللى انتشرت دلوقتى..!

من الاخر عناصر اللعبة التلاتة بيقربوا و يبعدوا عن الناس بحسب احتياجهم هما و مصلحتهم مش عشان الناس ... اما الناس بقى 85% المطحونين من الشعب فبيتفرجوا من سكات و كل همهم اللقمة و الهدمه و قرشين للعيال ... و شعارهم الاسمى دلوقتى ما حدش فاهم حاجة و اهى ماشية سيبها ماشية ... ده ملك و منظمه سيدك
و سلام للناس ...!!

ههههههههههههههههههههههههههههههههههههههه كلام جريئ وكلام معقول بس على فكرة انت لسه قاعد فى بيتك
لو لسه قاعد فى بيتك الحق اهرب

كلام جامد جدا وحلو

no love and no life كتب:: ههههههههههههههههههههههههههههههههههههههه كلام جريئ وكلام معقول بس على فكرة انت لسه قاعد فى بيتك
لو لسه قاعد فى بيتك الحق اهرب

ويهرب ليه
بيكلم صح
واذن ان بعد الثورة دي
البلد بقا فيها حرية
ومحدش يقدر يتحكم في كلامك
الا لسانك