باحبك إبنه وصديقه
باحبك أم وشقيقه
باحبك ساكنه وطليقه
باحبك صافيه وبريئه
باحبك زهره بريه تعطّر بالعبير الصخر
باحبك نسمه فوقنا تهدّى ساعة حر
باحبك شمس شموسه تدفّى جته بردانه
ونقطه ميه فى الصحرا تروّى أرض عطشانه
باحبك كلمه منسيه
مدويه
وبسمة فجر
*********
باحبك حب غير الحب عند الناس
وأستناكى ع السكه
كما لو كنت عيّل شوقه قايد نار لحضن أمه
بيشكى لها وتسمع له
لو انها بس بالاحساس بتعرف إيه شغل باله
تبوس الخد وتضمه
وتصفى له
وتغسل بالحنان همه
***************
غريبه لو تكون الأم أصغر م الوليد بسنين
لكن ياأمى
ياأختى
ياعيّلتى
حنعمل ايه فى قبضة إيد بتتحكم فى مشاعرنا
نحب فلان وغيره لأ
ساعات يمكن نكون على حق
وساعه لأ
ولانملك فى يوم تفسير
عشان الشخص منا أكيد
لقبضة ايد
فى صدره أسير
*************
ساعات الطفل يترازل على أمه
تقوم تغضب
وتقرص ودنه وتعاقبه بحنيه
وأنا لو كنت ضايقتك بالحاحى عشان عايز أكون جنبك
أكون طهرك
أكون ذنبك
فمن حقك تجازينى بأى وسيله ترضيكى
سوى إنك تجافينى
يانور عينى
********************************
أنا مش عايز اتّاقل على الناس اللى حبيتهم
بدون أسباب
وأتمنى من الرحمن نكون اصحاب
ومش عايز فى مره شفايفى تجرحهم
أنا عايز أشاركهم فى أتـــــراحهم
عشان الحزن أنبل شئ ظهر ع الأرض
فى طفولتهم
طفولة قلب معرفشى فى يوم اللؤم
واللا الحقد
واللا البغض
فى أفراحهم
عشان البسمه ع الشفه تفرّقنا
تجمّعنا
تخللى للحياه معنــــــــــــى
**********************
ووعد أكيد يا عيلتى
ياأمــى
ياأختى
ياصديقتى
حاحبك مهما كان منك صدر بالقصد أوغير قصد
وحافضل ليكى ضلّيله فى ساعة صهد
حاكون ليكى لسان الصدق والحكمه
،،وصدر حنان،، ....
مخـــــــده ومهــــــــــــــــد
87/12/22
موضوع: أمّى أصغر منّى 
الخميس 26 أغسطس 2010, 11:44 pm
