تعمل ايه لو بقيت الريس......وربنا يستر

السلام عليكم ورحمه الله وبركاته

بمناسبة قرب انتخابات الرئاسه اتفضلو
دى مجرد فضفضة ... تنفيييييس

تخيل كدا انك بقيت الرئيس
احلم
يا عم انت هتدفع حاجة من جيبك
الحلم ده على حسابى
غمض عينيك شوية واحلم انك بقيت رئيس البلاد

متقولش ازاى .. مش مهم

زورت الانتخابات ... او قلت للناس انتخبونى احسن ارمى نفسى من فوق البرج فصعبت عليهم قاموا

انتخبوك .. او يكون لك واحد صاحبك امريكاوى بتكلمه على الياهوو وقال لبوش (او اوباما دلوقتى) انك ولد

مجدع ورجولة وكفاءة وانك من بتوع العولمة والعوالم والنظام العالمى الجديد لنج .. ومش من اللى بيصلوا الفجر
جماعة ... فوافق بوش (اوباما ) انك تقعد على ... الكرسى

المهم انك بقيت دلوقتى رئييييييييييييس البلاد
مين قدك يا عم

هتاكل طعمية مقلية بزيت فرنساوى وربنا هيتوب عليك من طعمية عم ابو عفيفى المقلية بزيت العربيات

وهتتعالج من انيميا الفول .. الفول الجديد بقه يا عم من غير سوس

وابقى قابلنى لو لقيت اى مسمار فى العيش ... هتاكل عيش من ابو الرغيف بربع جنيه ... سخن وطازة وطرى .. تخيل .. طرى مش زى العيش اللى انت كنت بتاكله وانت بتشرب كباية ميه ورا كل لقمة علشان تنزل

لا لا العيش ابو شلن ده اللى انت كنت بتجيبه من الفرن وعقبال متوصل بيه البيت يكون خشب واتحجر ... وتعاقب عليه دوليا لأنه اصبح من اسلحة الدمار الشامل ... لا انسى الكلام ده خالص
الاوضاع هتتغير خالص ياعم ... دا انت ربنا هيكرمك خالص والله العظيم

طب بص دى ... هتاكل لحمة... طب والله لحمة .. متبرقش اوى كدة ... مش عارف يعنى ايه لحمة
(هم هيقولولك )

وبعدين انت مش كنت بتسمع وانت قاعد على القهوة وحاطط رجل على رجل وصباعك طالع من الجزمة انهم حيستوردوا حاجة كدة من السودان واثيوبيا
آه فاكر
اهى هى دى اللحمة
لا لا مش اللى انته كنت بتاكلها فى العيد ، بتاعت العيد دى اسمها كرشة ... متفضحناش بقه الله يسترك

وهيبقى فيه كنتاكى .. متسألش .. دى فراخ يعنى هتودع عم لطفى الفرارجى اللى كان بيعين لك رجلين الفراخ وانت كنت بتقول له عشان الكلب وكان ساعات يفوت لك حتتين قنصة على حتتين كبدة من بتوع الزباين اللى بيستحموا بصابون اجنبى

وهتشرب السيجارة كلها مرة واحدة .. يعنى مفيش تخميس
وبعدين دى سجاير ستراكى سترايك من بتاعت الست مارى منيب .. جو تانى

بس لما يخدوك علشان تحلف اليمين
ياعم دا غير يمين الطلاق اللى انته مصدره فى كل حدوتة تحكيها

اصحى معايا الله يكرمك

لما تروح تحلف اليمين اوعى تروح بالبدلة بتاعت جوازك .. انته عارف ... دى بقت مكيفة الهواء من كل ناحية .. العربى جوز ام بطة عنده بدلة اخوه باعتهالو من بلاد بره ابقى استلفها منه وإقضى مصلحتك وبعدين رجعهاله ... ماهى الجيران لبعضها امال ايه

وحياة رحمة امك وابوك وكل الناس اللى تعرفهم يا شيخ متروح بالجزمة بتاعتك ... عشان خاطرى ابقى اشتريلك جوز جزمة من بيع المصنوعات دى رخيصة هناك .... لأن الحدوة اللى انته مركبها في كعب الجزمة بتعمل صوت .... قلق برضه .. وبعدين ممكن الجهاز يصفر عليك تبقى حكاية ... فاهم

أول يوم بس وبعدين همه بعد كدة هيتصرفولك فى جوزين جزم مستوردين عشان تقابل بيهم اصحابك بتوع الدول التانية

وهتنام على سرير عليه مراتب .. المراتب دى بقه جواها قطن ... ايوة قطن ... والله العظيم قطن .. ايوه تمام زى القطن اللى انته جبته من الاجزخانة للوله حودة ابنك لما الواد شحته ابن ام بيسة لزقه بالطوبة فى نافوخه فتحهاله

وجريت بيه على المستشفى قالولك هات لنا قطن وشاش وميكروكروم وصبغة يود وبلاستر وسرنجة وحقنة تيتانوس وكيس دم واقطع تذكرة بخمسة جنيه من شباك العلاج المجانى .... ايوه هو ده القطن ... فهمت

هتحلم أحلام نضيفة على السرير دا يا عم الحاج

افرد طولك ... متخافش رجليك مش حتطلع برة الاوضة .... انته مش فى بيتكم دلوقتى .. افرد افرد ... غمض عينيك كده .. غمض

ايه ... انت نمت اصحى يا عم ... اصحى ... الباب بيخبط ... الحق .. موظفين الكهربا على الباب ... الحق دول جايين يشيلوا العداد

علشان بقالك 3 شهور مدفعتش الفاتور ة
هههههههههههههههههههههههههههههههههههههااااااااااااا ى

ال ريس ال

خلونا فى المفيد: يا ترى ايه الحلم اللى نفسك تنفذه لو بقيت

الريس؟؟؟!!!!!!

منقووول

متخوفش اتكلمو بصراحه

انا في ظهركم

بس ساعة الحبس ولا اعرفكو

ربنا يستر

يا اسلام احلم انى ريس ر

يس مين يا عم دا بكفاية على انى حلمت انى قرائت الموضوع داال ريس ال دا انت لو فكرت تبقى ريس يصدروا عليك كل افكارك واحلاامك

يا عم الحاج البلد فيها ميت ريس 000مجلس الوزرا 00مجلس الشعب 0000الحزب الوطنى

وهتروح فين يا مسكين

دا ظاظا لما فكر يجيب سلاح ويحمى البلد قتلوة

وعلشان تبقى ريس لاازم كل الحرامية الى فى البلد ينزاحو الاول

سلام يا ريس

انا لو رئيس اول حاجه هعملها
1. عزل الوزراء الفاسدين.
2. اقامة مشاريع صغيرة للشباب.
3. منع التصدير وتكفية احتياجات الشعب من موارد واغذية.
4. تعديل بعض المواد فى الدستور الذى تحفظ حقوق المواطن.
5.منع الخصخصة التى تشرد العاملين من افراد الشعب فى المصانع.
0000000000000000000000000000000000000000
وغير كده عمر اللى انا بقولة هيحصل
لان البلد مفيش فيها موظف عنده ضمير
كل لازم يترشى عشان يعمل مش شايف
ممكن يبقى فيها 2% موظفين محترمين
ــــــــــــــــــــــــــــــــــــــــــــــ
ده نصبنا

» ياترى هتبطل تعمل إيه فى رمضان؟؟؟
» انا الريس
» رقم تلفون الريس
» فكر قبل أن تعمل
» لو عندك طفل رخم تعمل ايييييييييه ؟؟؟