السلام عليكم
انا سعيد جدا بدعوة الاستاذ عبد الرحمن البطة للانضمام للمنتدى ويشرفنى انى اكون عضو معاكم
ودى اول مساهمة لية يارب تنال اعجابكم وياريت اشوف ردودكم
انتى هي
وبتسألى عن معنى الحب فيها
وعن غنوة فى موالها وكلمة بتشجيها
وبتسألى عن حفنة من طينها
ودمعة بترويها
بتسألى عنها وعيونك
صفحة صفحة بتحكيها
الحب فيها من غير سبب
والهجر فيها من غير سبب
خضرا كما قلبك لما ابتسم
.. اسود غطيس ساعة الغضب
بنكرهها ونلعنها .. ونرجع تانى نصفالها
وتنادى ولادى نقووول .. نعم
أنا لما شوفت فى عيونك سمارها
والنيل بيجرى فوق جبينك
والصمت حاير بينى وبينك
سألتى عنها من غير كلام
قولنلك ..
هي انتى بالتمام
حتى في خوفك لما تشكي
وف منامك لما تحكى
تنامى ويحرسك الف خفاش فى الضلام
انتى هي بالتمام
لما الغموض يملى وشك
واما بكرة فى يوم يغشك
تصفحي عنه كأنك
ماعرفتى فى قانونك انتقام
لما تبقى الزحمة فى مشاعرك
لما تتوه منك شوارعك
تبنى فوق حيرتك كبارى
ويزيد زحامك ازدحام
انتى هي لما تحبى
لما تصبى حبك بقلبى
واما اندهلك حبيبتى
القى صدك فى الكلام
لما اعشق بس طيفك
واما يبقى العشق كيفك
ترسمينى فارس فى جيشك
وتمسكى انتى اللجام
انتى هي حتى فى حروبك
والنصر بيزين دروبك
انتى هي بالتمام
انتى كما .. مصر السلام
أحمد سالم
موضوع: أحمد سالم "انتي هي " 
الخميس 09 سبتمبر 2010, 10:56 pm
