لحظة جنون

خلص الكلام ومعدش فاضل للسان غير السكوت
صمتى ملينى وحاسس كانى لحظة واموت
بدات اعانى
ضميت اديا سديت ودانى
معرفش لية
باشجب جنانى
ولا بارفض انى اسمع اى صوت
لكن الى عارفة انى فاكر كل شىء
الذكرى ليها ميت طريق ومحال تموت
نزلت ايدى
وبدات احسب كل شىء تانى بتانى
معادلة صعبة
قربت ليكى ازاى تساوى بعدتى عنى
عدد الحروف نفس العدد
لكن المعانى بتختلف
اتقتل فيا الجلد
وبدات لجنونى انجرف
ضميت ايديا لودنى تانى اصمها
حتى عنيا قفلتها
احاول اهرب او انام
ساعتين تلاتة مرو عليا ولا عام
وانا لسة باحسب فى المعادلة
من غير ما انام
نفضت جسمى اقرا رواية
يمكن اتوه جوا القرايا
لكن الرواية عليها هيا
بين السطور موجود خيالها بيبتسم منى وعليا
كتاب غبى فكرة غبية
رميت كتابى وبدات ابكى
ولنفسى احكى
قصة وكانت من زمان تحكيها امى
عن سندريلا والامير
وحب كان مالهوش كبير
وطريقه فضى
وقبل ماتم الحكاية
الذكريات رجعت تعود
مسجون وبيفك القيود
سديت ودانى من جديد
غمضت عينى
وقفلت عقلى بباب حديد
وخنقت انفاسى وسكوتى
حررت صوتى
وبصرخة جاهله وصوت بليد
بدات اردد
الموت مفيد
الموت مفيد
الموت مفيد